|
خوا خێری
ماڵپه‌ڕی
بیره‌وه‌ری
بدا! ئه‌و ماوه‌یه به هۆی سه‌قاڵی که‌متر بۆم ده‌کرێ شتێک
بنوسم، جارێ قسه‌خۆشه‌کان و بیره‌وه‌ریه‌کانی ئه‌و ماڵپه‌ڕه وه هانام
هاتوون. (به‌و هیوایه ئێوه‌ش شتێک بنوسن و بۆم بنێرن!!!) له باسێکدا
هاتووه:
میکرۆب
یه‌کێک له ئه‌رکه‌کانی سه‌ر شانی پێشمه‌رگه، بردنه سه‌ری زانستی خه‌ڵک
له سه‌ر هۆی نه‌خۆشیه‌کان و چۆنیه‌تی به‌ردنه سه‌ری بێهداشت له
دێهاته‌کان بوو. بۆ ئه‌م مه‌به‌سته له‌و دێهاتانه‌ی وا مه‌قه‌ڕیان لێ
بوو، بۆ خه‌ڵک کۆبوونه‌وه ده‌کرا و له سه‌ر پێویستی پاک‌بوونی ئاوی
خواردنه‌وه پێیان داده‌گرت و هه‌وڵیان ده‌دا سیسته‌مێکی باشتریش بۆ
ده‌رکردنی ئاوی مسته‌راحه‌کان دامه‌زرێنن، به تایبه‌ت له‌و دێهاتانه‌ی
وا له شاره‌وه دوور بوون.
ئه‌مه له ئاوایی '' ئاغوه‌تمان" روویی‌دا. ئاغوه‌تمان له نزیک تورجان
و سه‌ر به ناوچه‌ی بۆکان بوو و به حاڵه حاڵ ماشێن ده‌گه‌یشته ئه‌و
دێیه. چۆمێک به په‌نای ئاوایی‌دا تێپه‌ر ده‌بوو. له وه‌رزی
به‌هاریش‌دا زۆری ده‌کردو ده‌بوه هۆی لافاو و که‌ل و په‌لی ماڵه‌کان
و ته‌نانه‌ت چه‌ند حه‌یوانێکی دیهاته‌کانی سه‌رتره‌وه‌ی له گه‌ڵ خۆ
ده‌هێنا، ده‌یتلاندن و به به‌ر چاوی ئێمه‌دا به‌ره‌و خواری ده‌بردن.
ئه‌و چۆمه ئه‌و هه‌موه دێهاته‌ی دیکه‌ی به سه‌ره‌وه بوو، به‌ڵام به
سه‌ر ئه‌مه‌شه‌وه خه‌ڵک له ئاوی ئه‌و چۆمه‌یان ده‌خوارده‌وه و بۆ
لێنانی چایی و خواردنیش که‌ڵکیان لێ وه‌رده‌گرت.
له قسه‌و باسێک بۆ پیاوانی ئاوایی سه‌باره‌ت به خواردنه‌وه‌ی ئاوی
چۆمه‌که، پێشمه‌رگه‌ی به‌رپرس له قسه‌وباسێک‌دا، باسی میکرۆبی کرد و
شیی کرده‌وه که ئاوی ئه‌و چۆمه میکرۆبی هه‌یه و بۆیه خواردنه‌وه‌ی
ئاوی ئه‌و چۆمه زیان به سڵامه‌تی مرۆڤ ده‌گه‌یێنێ.
یه‌کێک له پیاوه‌کان پرسیاری کرد:
_'' میکرۆب چیه ؟.''
_ '' میکرۆب زۆر چکۆله‌یه، به چاو نابینرێت. بۆ دیتنی ده‌بێ میکرۆسکۆپ
به‌کار بهێنرێت.''
ئه‌و پیاوه‌ی ئاوایی که زۆر به سیره‌وه ئه‌یروانیه ئه‌و پێشمه‌رگه‌یه
و دیار بوو له چکۆله بوونی میکرۆب سه‌ری سوورمابوو، وتی:
_'' کوڕه کاکه ئه‌و چۆمه‌ی ئێمه گا ئه‌تلێنێ، میکرۆب چیه
بێ‌قه‌زابی''.
|