زاخاوی مێشک

له قسه‌ی کوردی‌یه ئه‌ڵێ:
جارێک یاپراخ و کفته و بڕوێش و تورشاو بو به شه‌ڕیان. کفته به بڕوێشی وت: به خێر تۆش ناوی خۆت ناوه شت؟! نه تامێک و نه شتێک. که‌چی ته‌شریفت دێته دیوه‌خان.
بڕوێش به‌وی وت: ده‌بڕۆ مردوت مرێ، ئه‌ڵێی تۆپه‌ڵه قوڕی خۆتت لێ کردوین به ئاغای سه‌ر گۆێسه‌بانان. ده بچۆ به‌ولاوه، ئه‌گه‌ر بتهاوێژن بۆ نێره‌که‌ر، ملی ئه‌شکێ!
یاپراخ روی کرده تورشاو و وتی: ڕه‌نگبێ تۆش فیزێ له خۆت بنێی بڵییت شتێکم؟ نه نانه‌ڕه‌ق خۆی له‌به‌رتا ئه‌گرێ، نه خه‌پله‌ی هه‌رزن ئه‌وێرێ توخنت که‌وێ، نه که‌ڵه دۆینه پێت ئه‌وێرێ. به‌ڵایه‌کیت که‌وتویته ئه‌م ناوه و سه‌رت له عاله‌م تێکداوه.
تورشاویش به‌وی وت: خۆ من هیچ نه‌بێ وام به روه‌وه، تۆ ئه‌ڵێ ده‌سته بوخچه‌ی تازه بوکی ناشیرینی چروکی، توند و تۆڵ خۆت پێچاوه‌ته‌وه و که‌س نازانێ ناوسکت چی تێدایه و ده‌ستی خه‌ڵک ئه‌بڕی. ئه‌گه‌ر فڕ و فێڵت تیا نی‌یه و ڕاست ئه‌که‌ی، بۆچ وا خۆتت پێچاوه؟!
"کارواناشی"ش له گۆشه‌یه‌که‌وه بو، گوێی لێ بو له ژێر لێوه‌وه وتی:"ئه‌وه ئه‌ڵێن چی؟"  هه‌مو به جارێ لێ هاتنه ده‌نگ وتیان:"توخوا ده‌م و فلقت به‌ره به‌ولاوه بێتامه‌ی ئاوی"خاسه" پیس که‌ره!
له‌‌م هه‌را هه‌رایه، "پڵاو" نوستبو خه‌به‌ری بۆوه. کۆکه‌یه‌کی بۆ کرد و به فیزێکه‌وه وتی:"ئه‌رێ هه‌تیوینه! ئه‌و هه‌را هه‌رایه‌تان له چی‌یه؟"
ئه‌مانیش وتیان:"قوربان ئاغا! کێ له‌گه‌ڵ تۆیه‌تی؟!"