|
ده‌گێڕنه‌وه:
سمایل ئاغای سمکۆ، که‌سێکی له لا بو به ناوی سۆفی محه‌ممه‌د. خه‌ڵک و خوا
گله‌ییان له سمایل ئاغا ده‌کرد که" ئه‌م سۆفی محه‌ممه‌ده زۆر جنێو ده‌دا و
زمانی به جنێو ده‌گه‌ڕێ. به‌شکم کارێک بکه‌ی له‌م خووه ببێته‌وه". سمایل ئاغا
سۆفی محه‌ممه‌د بانگ ده‌کا و گله‌یی خه‌ڵکی پێ ڕاده‌گه‌یێنێ و ده‌ڵێ:" ئه‌گه‌ر
جنێودان وه‌لانێی، به‌م پالتۆ و خه‌نجه‌ره‌ی له ڕوسه‌وه بۆم هاتووه خه‌ڵاتت
ده‌که‌م."
سۆفی محه‌ممه‌د به‌ڵێن ده‌دا و پالتۆ و خه‌نجه‌ر وه‌رده‌گرێ.
زۆر پێ ناچێ زستان دادێ و جه‌ماعه‌تی سمایل ئاغا له مزگه‌وت دانیشتوون و
له‌ولاشه‌وه ئاور هه‌ڵکردراوه. یه‌کێ له‌وان سیغاری توتن و په‌ڕی ساز کردووه و
به به‌رد و ئه‌ستێ و پوش ده‌یه‌وێ سیغاره‌که‌ی داییسێنێ. هه‌ر به‌رد له سه‌ر
به‌رد ده‌کوتێ و ئاوری بۆ ساز ناکرێ. ته‌قه ته‌قێک داده‌نێ هه‌ر نه‌بێته‌وه.
سۆفی محه‌ممه‌د ده‌ست به جێ پاڵتۆ و خه‌نجه‌ره‌که له پێش سمایل ئاغا داده‌نێ و
ده‌ڵێ :"جا چۆن من بابی که‌سی وا نه‌گ...؟ ئه‌م ئاور و پۆله جوانه لێره‌یه به
ده‌نگی به‌ردان مێشکی سه‌ری هه‌مووانی بردووه."
|