زاخاوی مێشک

خوا خێری ماڵپه‌ڕی بیره‌وه‌ری بدا! ئه‌و ماوه‌یه به هۆی سه‌قاڵی که‌متر بۆم ده‌کرێ شتێک بنوسم، جارێ قسه‌خۆشه‌کان و بیره‌وه‌ریه‌کانی ئه‌و ماڵپه‌ڕه وه هانام هاتوون. (به‌و هیوایه ئێوه‌ش شتێک بنوسن و بۆم بنێرن!!!) له باسێکدا هاتووه:

جومهوری دیموکراتیک

پێشمه‌رگه  زۆر جار له دێهاته‌کان خه‌ڵکیان له مزگه‌وت کۆ ده‌کرده‌وه و قسه‌و باسی بۆ ده‌کردن. شه‌وێکی زستانی 1362 له دێیه‌کی ناوچه‌ی بۆکان کۆبوونه‌وه ده‌گیرێ و خه‌ڵک دوای شام له مزگه‌وت کۆ ده‌بنه‌وه. یه‌کێک له هاورێیان ده‌ست ده‌کا به قسه‌و له سه‌ر سیاسه‌ته‌کانی کۆمه‌ڵه ده‌روا. ئه‌و ساڵه کۆمه‌ڵه چه‌ند قۆناغی بۆ شۆرش دانابوو. یه‌که‌م جومهوری دیموکراتیک و له‌وێشه‌وه بۆ سۆسیالیسم و دواجار کۆمه‌ڵگای یه‌کسانی و بێ چین. ئه‌و هاورێیه ئه‌و شه‌وه ده‌ستی کرد به شیی کردنه‌وه‌ی ڕۆیشتن له یه‌که‌م پڵه‌وه بۆ ئاخریان.له به‌ینی قسه‌کانی‌دا، که ده‌یه‌ویست پێی ته‌زیوی جێ به جێ بکات، بایه‌کی لێ به‌ر بوو به‌ڵام که‌م که‌س هه‌ستیان پێ کرد. دوای کۆبونه‌وه‌که ، ئه‌و هاورێیه رووی کرده یه‌کێک له هاورێیانی دیکه و پرسی:
'' ئه‌رێ قسه‌ و باسه‌که‌م چۆن بوو؟''
ئه‌ویش وه‌ڵامی دایه‌وه:
'' به‌و تڕ‌ه تڕه پێم وا نیه هه‌تا جومهوری دیموکراتیکیش بگه‌ین!''

پێشمه‌رگه هاتوو چووتان ده‌کات؟

له دێیه‌ک وا پێش هاتبوو  سێ جار که پێشمه‌رگه له‌وێ کۆبوونه‌وه‌یان کردبوو ، هه‌ر سێ جاره‌که که‌سێک بایه‌کی لێ به‌رببوه‌وه.
جارێکی‌تر که پێشمه‌رگه ده‌رواته‌وه و له ماڵان دابه‌ش ده‌بن، یه‌كێک له پێشمه‌رگه‌کان له ساحێب ماڵ ده‌پرسێ:
'' ئه‌رێ پێشـمه‌رگه زوو زوو هاتوو چووتان ده‌که‌ن؟''
ساحێب‌ماڵیش وه‌ڵام ده‌داته‌وه:
'' باشه خراپ نین، جار به جار بۆیان بکرێ دێن و تڕێکمان بۆ لێ ده‌ده‌ن و ده‌رۆن!''