زاخاوی مێشک

له ڕشته‌ی مرواریدا هاتووه:
حه‌مه به‌گ وتی: کابرایه‌کم لا بو ناوی "قادره سوری" له‌ک بو. ڕۆژێک باسی پیاوی نوێژ قایم و دیندار ئه‌کرا! قادره سور وتی: ناشوکری نه‌بێ زه‌مان خراپ بوه، که‌س ترسی خوای نه‌ماوه، خه‌ڵک به ته‌نگ نوێژ و ڕۆژوه‌وه نین. ساڵێک له‌گه‌ڵ بیست سواری هه‌مه‌وه‌ن چوین بۆ جه‌رده‌یی، له قاته قاته‌کانی که‌رکوک کاروانێکمان ڕوت کرده‌وه. سه‌رکرده‌که‌مان "مه‌خول" هه‌مه‌وه‌ن بو- به‌ ڕه‌حمه‌ت بێ- به ده‌ستی خۆی پێنج که‌س له کاروانه‌که‌ی کوشت! هه‌مو بار و شتومه‌ک و وڵاغه‌کانمان هێنا گه‌یشتینه "شیوه‌سور" ، بستێکی مابو ڕۆژ ئاوا ببێ. هه‌زار ڕه‌حمه‌تی لێ بێ، مه‌خول بانگی کرد:"عه‌شیره‌ت نوێژم نه‌کردوه". دابه‌زی به په‌له په‌ل ده‌ستنوێژی شت و نه‌یهێشت نوێژه‌که‌ی بچێ، نوێژی خۆی کرد!. ئینجا پیاوی وه‌ها دیندار ماوه؟!

(قادره‌سو‌ری فه‌قیر، نه‌یده‌زانی ئێستاکه، پیاوی وا نوێژ قایم و دیندار زۆرن!!)